عبدو بنحليمة
فمدينة البئر الجديد كايتعرضو عمال النظافة لمعاناة يومية كبيرة كايخدمو من صباح لعشية تحت أشعة الشمس الحارقة وفظل ضغط ومراقبة مشددة من طرف مسؤول الشركة.
الخدمة اللي كايقومو بيها شاقة بزاف خصوصا وأنها فوق طاقتهم الجسدية، حيث كان من المفروض تستعمل فيها آلات كبيرة بحال “تراكس”، اللي تقدر تنجز المهمة فظرف وجيز بلا ما يتعذبو هاد الناس.
المواطنين كيعبرو على تضامنهم مع هاد الفئة البسيطة اللي كاتخدم على طرف الخبز بعرق الجبين، وكيقولو أن هاد الطريقة إهانة لكرامة العامل وتهديد لصحتو خاصة مع الحرارة و الظروف القاسية.
المسؤولية هنا ماشي غير على الشركة اللي خاصها تحترم حقوق العمال وتوفر وسائل حديثة بل حتى على المجلس البلدي اللي غايب وماكايتدخلش باش يفرض شروط تضمن للعمال بيئة إنسانية وآمنة.
اليوم الكل كيسول. واش كرامة العامل البسيط ما كاتسواش؟ واش صحة ولاد البلاد أرخص من جرافة ممكن تريحهم من هاد العذاب؟
